Page 38 - revista agaca 156_web

38
mundo cooperativo
AIRA crece máis do 25% en tres anos e
integra Mopán e Coba de Vales
AIRA celebrou a súa asemblea xeral o 24 de novembro en Taboada, onde presentou os
resultados dos dous últimos anos: encadea tres exercicios de crecemento e pecha as contas
de 2020 cunha facturación de 125 millóns de euros. Tamén se aprobou a adhesion de dúas
cooperativas Coba de Vales e Mopán.
A entidade agraria presentou os resultados
económicos dos últimos dous exercicios que
amosan un crecemento de máis do 25% dende
o proceso de integración realizado en 2018.
«Medramos todos os anos a un ritmo sostible,
por encima do 8% nestes dous últimos exercicios,
e fixémolo en todas as áreas», explica Daniel
Ferreiro, director xeral de AIRA.
A cooperativa lucense pechou 2020 cunha factu-
ración de 125 millóns de euros e cun crecemento
do 8,5%. No 2019 AIRA acadou unha factura-
ción de 115 millóns de euros, o que supuxo un
crecemento do 8,9%. O volume de facturación
acadado, fronte a os preto de 98 millóns que
manexaba no 2017, é un dos claros indicativos
da consolidación do proxecto de integración
iniciado hai tres anos.
«Non medramos a base de subir as marxes de
beneficio dos produtos, senón que incremen-
tamos a facturación porque aumentamos o
volume de actividades e servizos prestados, o
que nos permite sermos máis competitivos e xerar
mellores resultados», detalla Ferreiro.
Na asemblea, que tivo lugar no polideportivo de
Taboada e estivo condicionada polas medidas
de prevención da Covid-19, tamén se aportaron
outros datos económicos como o nivel de EBITDA,
é dicir, os beneficios brutos antes da dedución
dos gastos financeiros e tributarios, onde AIRA
acadou os 4,7 millóns de euros no 2020.
AIRA consolídase como entidade de referencia
dentro do mundo agrario, non só polo volume
de negocio, senón tamén polas oportunidades
que xera no mundo rural, con máis de 250 postos
de traballo directos, e polos servizos que presta
a máis de 2.500 persoas socias en 86 conce-
llos de Galicia. «Máis salientable que o propio
crecemento en facturación é que medramos
en volume de actividade en todas as áreas: na
comercialización e nas actividades e servizos que
desenvolvemos», destaca Ferreiro.
Máis de 12 millóns en investimentos
Outro dos puntos que se trataron na asemblea
foron os proxectos que AIRA ten en marcha para
a valorización dos produtos, unha das prioridades
da cooperativa. Un dos maiores investimentos
neste senso lévase a cabo na planta de transfor-
mación de leite Galacteum, situada en Melide,
posto que boa parte das persoas socias de AIRA
son produtoras de leite.